أول رد للفنانة حلا شيحة على انتقادات الجمهور لها بسبب أغنية تامر حسني

تصدر كليب أغنية النجم تامر حسنى “بحبك” من الفيلم الجديد الذي تم إصداره مؤخراً فيلم”مش أنا” الترند على موقع يوتيوب و تمكن من تحقيق مشاهدات وصلت إلى 2 مليون و 700 ألف مشاهدة، و تم البحث عنه وسماع هذا الكليب بالذات بكثرة في الأيام الأخيرة بعد التصريحات الغير معتادة من قبل الفنانة حلا شيحة التي انتقدت الكليب التي شاركت فيه و طالبت بحذف المشاهد التي ظهرت فيها و ذلك من باب كونها تدعو للتبرج و العلاقات المحرمة ، مما سبب الكثير من التعليقات المتناقضة بين المؤيد و المعارض للكليب الخاص بالفنان تامر حسني ” بحبك” من فيلم “مش أنا” . 

وقد قامت الفنانة حلا شيخة بالرد على كل الإنتقادات التي لقيتها في الأيام الأخيرة بعد التصريحات التي أدبتها بخصوص أغنية “بحبك” للفنان المصري الشهير تامر حسني ، وكان الرد من خلال صفحتها الشخصية على انستجرام و جاء فيه : 

حابة أشكر كل الناس الجميلة علي رسايلهم الجميلة المشجعة.. 😊
وحابة أشكر كل الصحافة اللي نشرت فتوى دار الافتاء النهارده اللي موقفي هو نفس موقفها اللي بيوضح إن التمثيل و الفن عموما زي اي مهنة في الدنيا حلاله حلال وحرامه حرام.. وأنا لا أحب ان اكون جزء من اي نوع من التطرف سواء باسم الدين او باسم الفن.. ولو نقابة المهن التمثيلية ترفض موقف دار الافتاء الواضح فهنيئا لي بشطبها لعضويتي.

حبي للفن محدش يقدر ينكره ولا يزايد عليه.. انا ماتكلمتش غير عن نفسي وبقدر كل زمايلي.. الزميل الوحيد اللي ذكرته هو اللي الموضوع اصلا متعلق بيه.. وعتابي ليه لحسن ظني بيه.. والعتاب في الملأ عشان الكليب في الملأ.

وبالنسبة للكلام غير اللائق عن الأجر.. كل اللي في المجال شاهدين اني كنت اعتذر عن عدد كبير من الاعمال الفنية وكنت بقبل اجور اقل مما يتناسب معي تعاونا مع صناع العمل.. واصلا ما استلمتش الجزء الأخير من أجري في الفيلم لما أتأخر نزوله جدا و بدأت اتغير وأصلّح.. لأن بصراحة الكلام عن (أجر كبير) ضحكني.

انا فنانة بطبعي ومن صغري وكل اللي يعرفوني عارفين حبي للفن.. ودايما هعبر عن نفسي بمواهبي الفنية لما أحب لكن الجديد اني مش هاعمل كده على حساب اللي انا مؤمنه بيه بجد جوايا زي ما قولت مؤخرا.. انا لا اهاجم احد و لا احارب احد و لا انا افضل من احد و لا انصح احد قبل ما انصح نفسي اولاً و كلنا نخطئ مفيش حد معصوم من الخطأ …
و بتمني الخير دايماً لكل الناس بما فيهم كل زمايلي و صناع العمل.

مفيش اجمل من اننا نعيش و نستمتع بحياتنا و نفرح و نتبسط و نبسط ولادنا و نفرحهم و نفرح معاهم و نربيهم علي قيم و اخلاق مبقتش موجودة في ايامنا دي و نربيهم و نتربي معاهم و نغلط و نصلح و حنفضل نغلط و نصلح و لازم نغلط بس جميل اننا نعترف بغلطنا و نصلحه و نتعلم منه و حنفضل نتعلم احد ما نموت و نعيش مع كلام ربنا الجميل و نفرح بمنهجه و نحب الحق و العدل و الخير و الجمال و الابداع الرباني الجميل

جميل اننا نعمل كل ده وفق منهج مفيش اجمل منه و لا اعدل منه و لا اعظم منه في الكون كله ♥️